Selasa, 27 Januari 2009

M A N U MAPUTE ANNA MANU MALOTONG



M A N U MAPUTE ANNA MANU MALOTONG

Bag 1
Masahoro dissang mua mappammula tau mengaji dio di kapputta, biasana nasio tau Annangguru mambawa apa-apa atau diang parallu dipataya. Diammo mesio mambawa manu. Nazdiapai zdi’o? Nazdipakei maccera. Tetapi laeng Annangguru laen toi tia napesioang. Apa diatto’o biasa sangga misio mambawa wai pute sambotol, apa nanawengangi pa’doangag. Mane dizdundui. Diatto’o misio mambawa sokkol duan drupe. Sokkol mapute anna malotong. Poko’na ma’rupa-rupai. Tetapi ia nasang anu napisioang Annangguru sangeng diang hikmana. Apa di’o? Purapai dibahasi. Tetapi nandiattu’u Annangguru misio mambawa saping atau beke sebagai paccera. He he he he… mangino tau luluare’.
Jari di’o luluare, laengi Annangguru laeng toi tia napisioang lao di an’gurunna. Nah, sittengang tomi di’e na’alami (disangangi rekeng) Firman. Ia di’e nana’eke diwattunna melo mappammula, tallundrupai tia napisioang Annanggurunna. Oikh… mai’di teng?. Ya’ kang purami dingena dipau, mua laengi Annaguru laeng toi carana atau anu napisioang. Apamo tia bapisioang Annagurunna. Iamo mesa manu mapute bulunna, mesa bo’o manu malotong bulunna, anna sallambar kaen warna mapute.
Akhirna, diwattunna purami napauanni Firman Annanggurunna ia anu nanawawa, malaimi lao di boyanna Firman mane napauanni Pua’na anna Kindo’na. Mauammi.
“O’Pua, polea dighena le’mai diboyanna Annangguru, mauana lao mua meloa me’guru lao mangaji.”
“Eh, mangapana andango mauang mua nasauo diboyanna Annangguru. Maunya pa’uango dolo kabe. Supaya siola tau sau.”
Battuanna di’o, tomamumeppa mappau lao di Annangguru mua melo’I ana’na me’guru mangaji. Apa masahoro memang toi tia bassa di’o. lebih macoai mua sioalai tomawuweng ana’na lao di Annangguru atau tomawuweng sisanna mappau lao di Annangguru. Ia di’e disangai “ta’zdim”, atau mengohormati Annangguru. Jari mesa jamangang atau panggauang diang toi tia ada’na atau tuntunanna. Etika dan akhlaq nasangan to Indonesia. Teteapi andattoi tia diposara mua alawena nanaeke ma’uang lao di Annangguru, mua diandi rekeng saba’ atau terpaksa. Ia di’e apa-apae khusus mua melo’I tau me’guru lao di Annangguru. Iamo tu’di pappasanna tomawuwetta atau kanne’ta mendolo le’mai, sebagai penghormatan lao di Annanggurutta. Parallaui tu’u dipahang luluare’ di’e apa-apae, apa supaya barakka’I pe’guruang dilolongang. Andattowandi tu’u macoa mua mai’di ilmu alias manarang tapi andangi silolongang panggauang. Karake’ sifa. Sangga dio tappa ilmu di ulu. Andangi situru ilmu anna panggauang. Memang naissangi apa-apa, tetapi andangi napughau/najama-najama.
Mai’di tu’ dita dini di negarata tomai’di ilmunna tapi andangi silolongan panggauanna. Ditami korupsi, perampo, perzinahan, si-siallangang. Saba’na apa? Salah mesana nandiang penghormatan lao di Annangguru. Mai’di dite’e nanaeke pasayu lao di gurunna. Diatto,o ana’guru ma’ewa Annanggurunnna. Mua mettami di kelas na mappagurumi Tongguru, merau ising tomi tia melo titteme, padahal inna naola? Laoi di parkiran mane nakappissi motorna Tongguru. Itami tandana pasayu di’I nanaeke bassae. Mua bassai di’e panggauange, aikhh… pakanynyammo’tia andangi nabengan barakka Puang Allah Ta’ala lao di pe’guruanna. Mau manarang.
Mendului tau lao di ceritana Firman. Massimbommi kindo’na.
“Ya’ so’naimo apa takkalami.”
Mappau bomi Pua’na. “Jari apa nauwa mating Annangguru?.”
“Anu Pua, nasioa mambawa manu mapute mesa, manu malotong bulunna mesa, anna sallambar kaen mapute.”
“ Anggannai di’o napesioango.?”
“Anggannami Pua.”
“Mi’apai allo nasauo marondong di boyanna Annangguru.?”
“Ma’uangi Annangguru, soro ashar.”
“Hmmm… berarti malimappai massakao manu mua mappandemo’o.” Kindo’na mauang.
Marondonna lao malimang. Mapandemi manu Firmang. Tappana sirumummi manu’na, massaki mesa manu malotong bulunna, mane nasolokko’i. Purai di’o massaka bomi manu mapute bulunna. Mia manya-manyami lao makkareppu’I manu. Iana tia kareppu’na tappa nasikkang. Hup, keo…keo…keo. Napiala le’bai tia. Macicca toi di’e Firmange. Nawawami lao di salokko. Eh, dolo’di, diwattunna melo’mo nasolokko’I, diang naita bulunna malotong sicco dio di dazdanna di’o manu’o.
“Ah, aluppas, sa’mapiamo sakana, diattoi tia palaknna malotong bulunna.” Firmang mauang.
Terpaksa nalassuang membali. Maitai bomi manu’na ia mapute bulunna. Diambomo naita. Tapi, tappana napinnassai diatto’o malottonna sicco dio di barona. Aikh… nandiang manu mapute tongan bulunna. Ceh, mangallo ulunna Firmang. Tania mangallo karena magharring. Mangallo andanditia diang mapute manu’na.
“Inna bassa di’e?”

BERSAMBUNG.....>

Senin, 19 Januari 2009

Gara-Gara P A N G I N O A N G


Gara-Gara P A N G I N O A N G

Diammo mesa wattu, nasio iKaco kindo’na mabawa piwongang lao di kama’na dion di ghalung yang situyu ma’jama. Mappasammi kindo’na iKaco.
“Ee… Kaco. Tarruso’ naung di ghalung’nah. Bawai di’e piwongane namupelambi’I kama’mu. Ia di’e wai loppa kopie da le’ba mutolloangi. Manya-manyai bawa. Dasa’jurru lomeang lao di tangalalang. Na’pauatto’o lao di kama’mu, nandiattu’u do’ayunna, diambandi tia dio di woyang tapi andanga mala mambawa, apa titolloi manini. Pi’ingaranni le’ba’I. da leppa-leppambo’o pangino. Nallai tu’u kama’mu”.

Ma’uammi iKaco. “Iyo, Kindo. Tenammo’o. Tapi uwawa tappai tu’di’e naung piwongane, apa meloa lamba mangino”.

Tappana pura nasammo napasilolongang di’o piwongano, miakke’mi iKaco. Diammo ande, bau bisa tunu, wai loppa kopi, anna roko’. Oikh… mai’di nawawa iKaco.

Andallao masae, dio di tangalalang. Mallandurrimi’ iKaco Solana asi’ mangino dio di lapangang. Wah, miosai iKaco . miccokoi naung mappiasi’I ma’ita Solana mario mangino. Diammo naita Solana sitindro-tindro nasipinggulilingang. Purai di’o, mindulu woi lao di batu (markas). Mua purai mainda’I batu, mala bomi mattindro balinna. Tapi, mua mainda’I toi tia balinna batu dio di markasna, ia bomo matindro. Mua diang mala nasaka, mau sangga naka’bi sicco bayunna, menjari tahanangi. Lambisallao cappu nasaka balinna, sampe mala mainda’I batunna (markasna) balinna, iamo tu’u menjari pakala. Ia di’e panginoange disangai ‘mam-Bom’.

Sambil mappiasi’I ma’ita Solana mangino, ma’bisi’mi iKaco lao di alawena. “Ceh, tenna andanga’ nasio kindo’u mambawa pinwongang lao di kama’u, pasti mangino toma’ i-yau.”

Mamanyai asi’ iKaco ma’ita Solana mangino, tappa mi’illongi iSalle, mampperoai mangino to’o apa kurangi anggotana. Maummai iSalle.
“Hoi…Kaco. Le’maio pangino to’oe. Andappai ghanna anggotae..”
Mauttomi tia iKaco.
“Aikh… sori sola. Andanga’ moka mangino, Cuma’ nasio da kindo’u mambawa piwongang lao di kama’u dion di ghalung. Jari andanga' mala mangino dite'e.”
Mappau bomi iSalle.
“Asa’ puurapai. Cinappa’mo’o pangino.”
Tappa pole toi tia iRamang mapperoa.
“Iio… purapai muwawa diting piwongano. Andattopai karao begha dai allo. Mua parallui dikalulupao mambawa diting pinwongano.”

Mairranni paunna Solana, mappikkirmi iKaco. “Tongattoi tia de. Mua cinappa’da mangino andattoi tia di’e mangapae. Apalagi ia di’e piwongane ande tangnga allona kama’u.” Me’itami iKaco dai di langi mappinnassai mata allo, mua anddappai karao begha dai.

Apa saba’, tappa messitta’I iKaco. “Io, mangino toa.”
Napattunganmmi di’o piwongano lao dioroang macoa. Mane mia’sigha napilabbi’I Solana mangino. Akhirnya mario mangino tomi iKaco. Apalagi menjari andalangi dio di anggotana, apa majirrissannai' paindonna. Nagallari solana “Tintilingan” (nama salah satu lopi sandeq). Mua mattindro'mi balinna, tattami tia napiala mua andangi mendulu lao di markasna. Jari simata' pakalai anggotana iKaco.

Mua purai mangino mam-Bom, nasallai boi panginoanna. Tappa mam-Boi bomi. Ia di'o disanga mam-Boi, massusungi tau papang atau batu mapepa' mane di timbei bola kasti supaya ropo'. Mua malai disusun mendulu, na' andangi merua petimbena bali, maka iamo pakala. Ternyata dikalai anggotana iKaco mam-Boi. Puasi mam-Boi, nasallei bomi panginoanna. Sipembuniambo'o napanginoi. Mesa pa'jaga, laenna lamba membuni. Mua naita pembunianna, tappa natappui sangana. Lambisallao naita nasang tomimbuni. Innai mindolo naita iawo'o ma'jaga. Pako'na asi' sanna'i panginoanna. Lambi' naluppei tomi tugasna iKaco ma'antar piwongan lao di kama'na dion dighalung. Malahang, nawuai tomi bayunna, apa base sanna'i narua omas. Eh...andattomi sadar cappu' nande piwonganna kama'na nasolai solana.

Wattu mellamba tarrus, pole tomi tia allo marawiang. Malai'mi sisammesa solana iKaco lao diwonna toi tia. Lambisallao sisannapa mottong dio di lapangan. Apa saba', tiwikke'mi iKaco.
“Hamma'. Piwonganna kama'u.”?
Sadarmi' iKaco. Mia sighami lao dioroanna napa'annai dighena piwongang. Ia tia, diwattunna tada' naitami di'o piwongano ternyata cappu'i. Mane naingaranna, pa purai palaka'na nande. Ceh, malumu sanna' buku-bukunna nasa'ding iKaco. Tikumba-kumba tomi dazdanna, apa marakke'i nallai kindo kama'na. Nasoso sanna' alawena iKaco. Apamo melo dipoloa. Takkala menjari peca'mi ande. Melo'i naung di ghalung napelambi'i kama'na, tentu andangi sirinaya, apa dio tia diboyang kama'na. Mau tammelo malai iKaco lao di boyanna siwawa ate tikumba-kumba saba' marakke. “Mua nallaida' kindo-kama'u, apa melo' dipoghau, salau tori iyau.” paunna iKaco di lalang di atena.

Andammasae, tada'mi iKaco di boyanna. Napecoaimi nyawana, mane melli'na tama di ba'ba. Ya' apa tia, andattopai sukku' tada naung peinda'na di boyang, tappa tiwikke' sanna' dami. Nasangai guttur, padahal kindo'na meirri'.
“Innari muola Kaco.”?
Andangi lawe-laweang iKaco.
“Muwawa inari diting piwonganna kama'muo. Ha'? Andangi nairrangngi talingammu dighena wattuna upapahannio de'.? Sa' puuuramo di ghonggolli tama talinganna supaya tarrus naung di ghalung, eh malai tia leppa-leppambo'o mangino.”

Oikh... ma'diloa sanna kindo'na iKaco. Andappai soso' kindo'na ma'diloa, kama'na toi tia macai. Hammadarasulullah, mane marasanadi' pa'dilona, apa siolan ajui tia ma'diloa.

Apamo tia napughau iKaco, sangga dio tappami' mammakko andallawe-laweang. Anna diwattunna nawei'i kindo'na hadiah 'pekapiu', napenyamanni tappa' naung monge'na. Melo'i tetes wai matanna iKaco apa ta'lalo mongena pekapiu'na kindo'na. Maneanna monge tongang nasa'ding. Rapalle'ba di'o angga'na nalukkas mae issinna upannao. Tanda monge'na. Tapi napirasai tappa'i iKaco, apa naissangi mua sitinayai narua piallai apa salai. Jari na'anggapmi' passokong asalanna. Sadari iKaco.

* * *
Bassai tu'di'o kabe, mua andangi dipecoai pa'ingaratta lao di papasanna timawuweng. Mua diang napesioang, tappa masighai dipoghau, purapai dipoghau anu napesioang mane lambai tau mangino. Da tappa lamba dolo pangino mua andappai silolongang tugasta'.

Da to'o simata masigha terpengaruh lao di peroana sola. Mau anu macoa, mua diang daparalluang da dolo tappa peccoe. Apalagi tia mua naperoao lao di anu karae. Dale'ba'mo tia kabe.
Pe'ingaranni sanna'i nah.!!! [Juna edogawa]

MENAJAMKAN PANCA INDRA

Kegagalan terbesar seseorang bukan karena Ia tidak bisa meraih sebuah prestasi, melainkan karena ia gagal memahami fakta kebenaran yang suda...