Syaikh Abd.Qadir Jaelanai - "Saba' Andang Losong"

Mairranni tau sangana Abd.Qadir Jaelanai, minnassai andangi tau mintule bandamo innai sanga di'e taue. 

Yanasanna ita umma' sallang maissang nasammi ia disanga Syaikh Abd.Qadir Jaelanai. Ia di'e tau'e ulama kayyang. Tania karna kayyanna alawena, tapi karana ilmu anna barakka'na paissanganna. Lambi' dite'e mai'di umma' sallang mappiccoe'i paissanganna. Disanga toi Syaikh Abd.Qadir Jaelanai ulama sufi.

Di lalang golongan tasawwuf, mua makkiringi salawa' pasti tu'u natappui sangana Abd.Qadir Jaelanai, apa ta'lalo pammasena di'e taue lao diPuang Allah Ta'alah. Mappau'i tau di'e tentang Abd.Qadir Jaelanai, parallau sicco dissang perjalananna diwattunna mappammula lamba mattuntu paissangang. 

Pada wattu di'o, oroanna paissangan kayyang/terkenal iamo tu'u sangana kota 'Baghdad' Irak. Ma'rupa-rupai indio-lao'o paissangan. Jari ia di'e Abd.Qadir Jaelanai, diwattunna keccu' melo toi tia lamba maitai paissangan dio di Baghdad. Na meccoe'i lao di Kafilah (rombongan para pedangang) lao di Baghdad. 

Nah, tappana diammo Kafilah melo miakke lao di Baghdad, napauanni'mi kindo'na Abd.Qadir Jaelanai mua namiakke toi. Mauammi Abd.Qadir Jaelanai lao di kindo'na. 

“O'Kindo. Na lambama tu'u me'guru lao di Baghdad, apa diammo Kafilah upeccoei'. Jari, iloramma lamba. Paratte'mi' alaweu anna urusangngu (tuo-mateu) lao di sesena Puang Allah Ta'ala.” 

Mairranni paunna ana'na, mauattomi tia kindo'na. “Hmm... mua nalamba tongando'o kabe, ya' sumayao. Da raghi-raghi kezdo. Pe'guru tongano'o. Supaya malai mulolongang pe'guruammu.” 

“Insya Allah Kindo.” Abd.Qadir Jaelanai mauang. 

“Tapi da dolo'di. (Mauangi kindo'na Abd.Qadir Jaelanai). Diang nau'wengano'o piwongang. Supaya mua diang parallummu malami mupa'guna.” 

Mittamami kindo'na di kamar. Anndallao masae messumbomi mendulu siwawa doi patappulo dinar. Napapiangammi kattombayu ana'na dio dinaung kalepa'na. Mane nannai tama di'o doi'o. Purai di'o, narai bomi kattong bayunna supaya andangi bemme doi'na. 

Nah, diwattunna melo'le'bamo miakke Abd.Qadir Jaelanai, mappasam bomi kindo'na. 

“Ee... kabe. Mua lambao diting lao'o, pecoai le'ba'i panggauammu. Jagai alawemu. Mua sipau lao ditau da le'ba todi pappau losong. Poko'na (sambil nazdonggo limanna ana'na) mauo apa na mulolongang, parallu sanna'o andang losong.” 

Iamo di'o pappasanna kindo'na simata naingarang Abd.Qadir Jaelanai. Supaya andang mappau losong. Akhirnya, tappana purami napasilolongang nasang sare-serena, miakke'mi Abd.Qadir Jaelanai siola para Kafilah. 

Ia zdi'o wattuo, millamba dua tau lao di baghdad. Apa nandiappa oto, motor, tandiatto'o kereta api, damo tia ditappui kappal luttus, mane nandianna di'. Jari, millambai tau lao di baghdad. Diatto'o biasa mappake unta atau sayyang, ia tozdiang anunna. Innamo tia bassa Abd.Qadir Jaelanai, mellambai tia tozdi. 

Andallao masae bongi. Mallandurrimi rombonganna Abd.Qadir Jaelanai pallawangang. Ia di'e pallawangang, simata mai'di dio towiwo atau perampo marrappa hartana para kafilah mua diang landur. 

Nah, diwattunna dio di pallawangang, diattongan perampo sa'maroa. Siwawa-wawa kowi malakka. 

Ya' apa tia, cappu nala parewana kafilah tonasolangan Abd.Qadir Jaelanai. Nandiang melo miewa, apa mai'di sanna'i tia perampo. Jari manyamassanna nyawana perampo ma'ala parewana para kafilah. Cappu tongan nala ia anu massipa'. 

Oikh... tappa diang mesa ana' buana perampo makkareppu'i Abd.Qadir Jaelanai. Napatule'mi. 

“Eh... Ana' kasiasi, apa mala uwala diting di alawemu. Diandi anu massipa mala uwala.?” 

Napatule' bassai di'o Abd.Qadir Jaelanai, mappikkirmi. “Mua ma'uanga' diang doi dikattong bayu'u patappulo dinar, pasti na'alai. Tapi mua ma'uanga nandiang, berarti losonga'.” 

Ah, tappa mauangi Abd.Qadir Jaelanai. “Diang. Diang doi patappulo dinar di kattong bayu'u, naraiyanga' kindo'u dio dinaung kalepa'u.” 

“Hahaha...... .” Micawa tappa'i ana' buana perampo. Pikkirna, “masa diang nana'eke kasia-asi mambawa doi sa'mai'di. Napipissangang topa oroanna doi'na. Andangi seha' kapang di'e nana'eke'e. Mangipi'i kapang diang doi'na mai'di.” 

Andattomori napindalingai Abdul Qadir Jaelani. Salama'i doi'na, apa andangi napokanynyang perampo. Diatta bomo' tu'u perampo. 

Wattunnna pura nasammo nala doi'na, parewana Kafilah, malaimi lao di markasna. Andallao masae, tada'mi perampo lao di markasna. Mallapormi ketua rombongang lao di kapala. Mauammi sattengandi'e doi, andeangang sa'anu, parewa-parewa sattengang. 

Wah, mario sanna'i kapala. Apa mai'di boi nalolongan ana buah. Mettule'mi kapala lao di ketua rombongang. “Pura nasambandimo muala di'e parewana kafilah.” Mauammi ketua rombongang. “Pura nasammi kapala.” “Hmm... bagus..” 

Tapi, tappa diang ana buah pole dio dipondo, mappau. “Anu Kapala....” 

“Apa melo' mua. Da pa'anu-anu.” Kapala ma'uang. 

“Bassadi'e kapala. Diang dinghena nana'eke kasia-asi, ma'uangi diang doi'na patappulo dinar.” 

Mettule'mi kapala. “Ya' mualai di'o doi'nao.?” “Andangi uwala kapala, apa andanga' makannyang. Apalagi kasiasi sanna'i uwita. Napipissangan towori oroanna doi'na mua dioi di kattong bayunna, narai kindo'na dio dinaung kalepa'na.” 

“Purai muparessa anna andango makanynyang.? Mettule bomi kapala. 

“Andappai uparessa kapala.” 

 Oikh.... Tappa macai kapala.  “Cangngo-cangngo pao. Poek. (Lippu sanna'i kapala). Pelambi'i masingha di'o nana'ekeo, bawai mai. Da'leba pia co'dong mua andango siola di'o nanaekeo. Apa ughere'o tu'u.” 

Hamma, mapillasi di'o ana buanao. Mala duai tia micacawa ghengge. 

“Apa duari mueppei. (Meirri bomi kapala). Tappa uratu ao mating di'e doe. Simata diting duao mippatung. Cangngo'.” 

Andammi sempa mambali di'e ana buae. Apalagi naita towori kapala maambei tongang doe. Tappa messitta'i miakke'. Napilambi'imi di'o nana'ekeo. Untunna toi tia andappai karambo begha lambana. 

Diwattunna nalambi'mo di'o nana'ekeo (Abdul Qadir Jaelani), mittule'mi mendulu ana' buana perampo. “He'. Nana'eke kasiasi. Diattongandi doi'mu.?” 

Mauambomi Abdul Qadir Jaelani. “Iye, diang patappulo dinar.” 

“Cowade'i uparessai.” Ana buah perampo mauang. 

Na'akkemi limanna Abdul Qadir Jaelani, mane nasio mandonggo dio doi'o. Tappa diang tongan nasa'ding nadonggo di'o ana buah perampo. Ma'uammi lao di Abdul Qadir Jaelani. 

“Bassai di'e, napipasannio kapalau. Nalao'o di markas siola tau.” Iari'e Abdul Qadir Jaelani, melo tomi tia nawawa ana buana perampo lao dioroanna kapalana. Purai di'o, miakke'mi Abdul Qadir Jaelani lao dioroanna kapala perampo. 

 Mapocci cerita. Tada'mi Abdul Qadir Jaelani siola ana buah perampo. Melapormi ana buah lao di kapala. “Indi'e nana'eke upa'uangang diang doi'na.” 

“Oo... bagus. Usanga andangi mala muwawa diting nanaekeo. Apa maneammu tu'u ughere tongang.” 

Mettule'i kapala lao di Abdul Qadir Jaelani. “Hei'. Diattongandi doi'mu patappulo dinar.?” 

“Diang puang. (Abdul Qadir Jaelani mauang). Dio di kattong bayu'u narai kindo'u dinaung kalepa'u.” 

“Innare'i. Me'itadza.” 

 Na'akke bomi limanna Abdul Qadir Jaelani. Tappana nazdonggo di'o doi kapala, nasa'dimmi kapala perampo mua diang tongang doi. Ma'alai kowi, mane nakenu di'o kattong bayunna Abdul Qadir Jaelani. Nalai di'o doi'o mane nawilang. Alawena kapala mambilang. Takkurang-tallabi, pas le'ba patappulo dinar sittengan napa'uangang Abdul Qadir Jaelani. 

Mariomi kapala perampo'. Apa diambomo tambahan doi mai'di. Tapi herangi. Mangapana melo'tendi di'e nana'eke'e mappipissangan mua diang doi'na. Mittule'mi kapala. 

“Eh. Mangapana melo'o mappipissangan mua diang doi'mu. Padahal tenna losondo'o namauango' nandiang doi'u, tentu andangi uwala doi'mu.”? 

“Anu puang. (Maccaritami Abdul Qadir Jaelani). Diwattunna meloa miakke dio diboya'u, napasanga' kindo'u supaya andanga mampau losong. Jari tappana mupatulea puang, ya' upaumi anu tongang, apa moka pawali-pawali lao dikindo'u. Andanga melo losong.” 

Masya Allah. Apa tia kapala, mairranni paunna di'e nana'eke, menjari mendi'dir alawena. Sumerre bulu-bulunna. Andattomi nasa'ding di'o doi ra'da dio dilimanna. Menduku naung di lita kapala. Ra'da tomi wai matanna. 

“Ceh, Laailaha illallah Puang Allah Ta'alah. Ia di'e nanaeke'e, keccu sanna duai, tapi naissammi sangana andang losong, andang pawali-wali lao di tomawuweng. Sedangkan alaweu di'e, simata mappughau anu korake. Simata' mangganggu tau. Mai'di tomi upatei. Marrappa baranna kafilah mua diang landur. Mai-mai'di pai tozdi dosau Puang.” 

Nasoso alawena kapala perampo, gara-gara kejujuranna Abdul Qadir Jaelani. 

Nara'ettimi Abdul Qadir Jaelani kapala perampo. “Terima kasih kabe.” (Kapala perampo ma'bisi). 

Akhirnya nasio nasang sadar ana buana kapala perampo. Nabubarkangi kelompok perampo. Lambisallao nandiang parampo dio dipallawang ia simata naoroi mahhadang kafilah. Ia di'e Abdul Qadir Jaelani, naantarmi lambi lao di baghdad ana buana kapala. Napependulu tomi doi'na. Sala'mi Abdul Qadir Jaelani karena pammase di Puang Allah Ta'ala. 

Iamo tu'u acoangan dilolongan mua simata mappau tungani tau anna andangi tau pawali-wali lao di tomawuweng. 

Iamo di'o sicco ceritana Abdul Qadir Jaelani diwattunna keccu. Ta'alalo tu'u macoa pangguang ia disanga Abdul Qadir Jaelani. Ia tomo tu'u mappakayyang sangana anna terkenal lambi' dite'e. 

Masya Allah. Wallahu a'lam. [Junaedogawa]